Ang pagbalik sa gigikanan!!

Sa usa ka suotong lungsod sa Sugbo nga gihinganlan og Aloguinsan, adunay usa ka batang gihimugso sa usa ka mapailawmon og mahigugmaong inahan niadtong tuig mil nuybe sintos otsenta ‘y dos (1982) sa ika baynte-unong adlaw sa buwan sa Mayo. Sukad sa iyang pagkahimugso, gikaluhaan na siyang daan sa mga suliran (dili ba kitang tanan?). Niadtong panahona, ang iyang mga ginikanan walay klarong pangita. Ang iyang inahan usa lang ka mananahi, samtang ang iyang amahan usa ka banggiitang palahubog, sugarol, irresponsable og walay pakabana sa iyang mga anak.

Sa dihang nakat-on na og pangisip ang bata nga itago lang nato sa pangalang “Sekret”, matag buntag uban sa iyang mga maguwang, ila kining lugsongon ang bakilid nga agi-anan padu’ng sa tabay aron maligo og magkaws og tubig mainom. Sigon sa akong nasayran, du’l-an sa usa ka kilometro ang gilay-on niini gikan sa ilang balay. Gikan sa tabay, mga presko pa kining mga anghel nga andam na sab nga makigtigi sa pag-saka sa bakilid nga agi-anan balik sa ilang panimalay. Pag-abot nila sa taas, mura’g gikumot ang akong kasing-kasing nga maghuna-huna niining mga anghel nga nagka-gidlay og basa na kaayo sa singot og namuti na ang wa-it tungod sa kakutas og sa sobrang kapoy.

Pagkahuman nila og kaon sa ilang pamahaw, kinahanglan na sab nilang andamon ang ilang mga pal-pal kaayong mga tiil aron baklayon ang ilang tungha-an nga kapin sa usa ka kilometro ang gilay-on. Apan wala nila kini igsapayan, mauwanan man o mainitan taliwala sa dalan nga ilang giagi-an padulong sa tungha-an. Nahuman nila ang elementarya og ang atong sugilanon karon motuyok-tuyok na sa kalibutan sa usa ka batang gihimugso sigon sa akong nahisgutan – si “Sekret”.

Sa pagtungha ni “Sekret” sa high school didto sa (syempre sa eskwelahan) baranggay Poblacion, nipuyo siya uban sa iyang mga ig-agaw didto sa balay nga gipanag-iya sa usa ra sab niya ka ig-agaw nga usa ka maestra sa nahisgutang tunghaan. Mouli lang siya sa ilang balay nga nahimutang sa kinapusorang bahin sa baranggay Kawasan. Bisan sa iyang linghod nga panghuna-huna, kahibalo siya nga tungod sa ilang kalisod, kinahanglan niyang maningkamot aron ma-awhas ang iyang pamilya gikan sa lunangan sa kapobre. Ika-tulo siyang anak apan wala niya huna-hunaa nga ang kinamag-wangan nilang igsoon ang motuboy sa ilang pamilya gikan sa kalisod. Kinahanglan nilang magtambayayong aron maglampos ang ilang mga tinguha. Tungod kay aduna say kaabtik ang pangutok ni “Sekret”, ni-gradwar siya sa high school nga gi-adornohan sa mga bulawang medalya isip usa ka “salutatorian” og “artist of the year”. Nakab-ot niya kining mga pasidungog tungod sa iyang pagsalig sa Kahitas-an og sa iyang kaugalingon.

Ang duha ka maguwang ni “Sekret” nagtungha pa sa koleheyo sa dihang andam na sab siyang i-umol ang iyang kinaadman og bairon ang iyang naantigohan. Samtang ang iyang amahan, hinay-hinay na’ng nipadaplin sa mga nag-haguros nga mga pagtintal sa mga bisyo, hinay-hinay sab kining naningkamot aron barogan ang iyang pagka-amahan. Una pa, mobalik ta sa paghisgot sa kinabuhi ni “Sekret” sa dili pa ta mahisalaag. Padayong nagtungha si “Sekret” sa usa ka unibersidad sa Sugbo nga mao ang UC og gikuha niya ang Bachelor of Science in Information Technology nga propesyon isip usa ka Working Scholar Student. Human sa 4 ka-tuig nga pag-antos, nigradwar si “Sekret” sa unibersidad nga gapas-an sa usa ka dakong garbo nga iyang ikapasigarbo sa mga garbosong tawo sa kalibutan.

Pipila ka buwan human sa iyang gradwasyon sa koleheyo, nilupad si “Sekret” sa kaulohan aron pagbugtaw sa iyang kinaadman kuyog sa iyang maguwang nga babaye. Nadawat siya isip usa ka programmer sa usa sa mga kompanya sa Makati. Sa pagka-karon, hinay-hinay na nilang gi-bitad ang estado sa ilang pamilya inubanan sa mga grasyang gibu-bo gikan sa Kahitas-an, kinsa maoy naghatag ni “Sekret” og igong kusog og kaisog aron atubangon og sa pakiglantugi sa mga hagit sa kinabuhi nga iyang nahiaguman.

Ug mao kini ang istorya sa kinabuhi niining tagsulat. Salamat kaayo sa pag-usik ninyo’g oras diri sa akong payag sa kawanangan og hinaot nga daghan pang oras nga inyong i-sabwag aron lang sa pag-sunod sa mga binotbot nga mga istorya og balak nga nagagikan sa kina-uyukang bahin ning akong kasing-kasing.