Sabado nga puno sa Gugma~

Ang gugma og kalinaw sa Ginoo maana kaninyo [ayaw nalang og tubag kay kabalo na ko!]. Hello Philippines and hello world!

Gusto lang nako’ng isyagit ang akong pasalamat sa Kahitas-an sa mga grasyang Iyang gihatag diri kanako. Ni-adtong niaging biyernes, akong gisusi ang akong ATM kung naana bay sulod. Uyyy, nag-awas awas hahahahaha. Nisulod na diay ang retro sa akong sweldo. Usa lang ang nisantop sa akong huna-huna, ako nang kadenahan ang akong pinangga. Pero sa una pa lang katong bata pa kaayo ang among relasyon, kabalo na siya daan nga puno ko sa kabuang og dili ko typical nga tawong romantiko. Nadawat man sad kuno niya ang tanan kay kung magkuyog kuno mi pwerte niyang lipaya kay cge lang mi’g pangatawa.

Nag-alindasay ko pagkagabi-i ana, naghuna-huna kung unsa’y porma nga magustuhan sa akong pangging. Ang budget nako, 10K lang nga sing-sing. Akong gilibot ang tanang tindahan unya nibalik ko sa usa ka tindahan diin naa didto ang akong nagustuhan pero may pagkamahal. Nilapas sa akong budget. Nahinumduman nako ang giingon sa akong barkada, “mohangyo gani ka, katunga dayon!”. Ang orihinal nga presyo sa maong sing-sing kay 12,500. White gold siya nga naay gamayng bato nga gilubong sa tunga-tunga sa iyahang korte pero 14 karat lang. Medyo naa man sad to siya’y style. Nibungat dayon ko sa akong presyo, “6,000 nalang miss!”. Nihangyo sad ang tindera kung pwede taas-taassan nako’g dyutay. Niingon ko, “6,001″. Nikatawa uroy ang karaho. Pwerte hinuong bahak-hak og katawa sa iyang kauban. Unya naay niduol nga batan-ong babaye. Wow, engkantada. Super puti. Hamis kaayo. Nagpanakla gud intawn ko. Mao na diay to ang anak sa tag-iya. Niduol siya og siya na ang nakig-negosasyon. Hhhmmmm, pagkalapyo pa sa lapyahan ani uy. Wala dayon ko katingog. Nangutana siya, “Ano po yun sir?”. Nag-eyes to eyes dayon mi. Moingon unta ko og tagpila ka miss sa dihang nisagbat ang iyang tindera nga gihangyo kuno nako og 6,000 nya niingon daw sila nga pataas-taasan og dyutay nya 6,001 kuno akong giingon. Kalit lang nitabon ang chinita sa iyang baba og ang iyang cute kaayo nga mata hapit na mawagtang. Nikatawa nasad diay siya. Niingon siya nako nga maglisod sad kuno siya sa paghatag sa presyo nga akong gibungat kay tinuod man gud kuno to nga bato (dili syabu ha). 7,500 nalang daw last price. Drama-drama dayon ko. Patibi-tibi dayon sa baba bah dayon ingon, “Cge na miss, kabalo ko nga sa imong kaanyag walay presyo ang makatupong niana pero mao man gud na akong nagustuhan unya kung 7,500 akong bayad wala na koy alawans para sunod semana. Dugay pa biya kaayo among sweldo. Mosugot ka magka-ulcer ko tungod lang anang presyoha!”. Pwerte nuong katawa sa mga karaho. Ako intawn pwerteng paningot sa kauwaw sa akong drama-drama hehehehehe. Sus niingon bitaw na, “ok, 6,500 nalang!” Kung pareho pa lang kuno ko sa ubang kustomer nga magyawyaw og bati nga mga pulong dili jud niya ihatag og ingon-ato nga presyo. Sus pwerte jud nakong lipaya, kuot dayon ko sa akong pitaka.

Gitawagan dayon nako akong pangging nga magkita mi sa Gerry’s Grill sa may Pasay Road. Adto nako ipasul-ob ang akong napalit nga sing-sing nga maoy simbolo sa panaghiusa sa among dughan og sa madugay o madali, amo nang pabendisyonan sa pari ang among gugma atubangan sa Labawng Makagagahum. Pero plano namong magpakasal mga 2009 pa hehehehe. Ako man siyang giingnan nga nagreview pa man akong manghud karon so sunod tuig pa ko makasugod og tigom para sa among kasal.

Niabot siya didto sa restaurant, og sa wala pa mi mangaon, ako nang gipabuhagay ang tanan nakong gisag-ulo nga mga pulong. Nakurat intawn ang akong pinangga. Unya nikalit og tulo iyang luha. Wala jud kuno siya magdahom. Pagkakita niya sa sing-sing nga akong gitaod sa iyang tudlo, nisamot man hinuon og tubod ang iyang luha. Sus, puno jud sa gugma tong adlawa. Nahuman among panihapon og nanggawas mi sa restaurant nga parehong malipayon. Nidiretso mi sa sinehan, tan-aw dayon mi og Ratatuille kay pareho man mi og trip sa movies.. mga animation kasagaran namong panan-awon.. Dayon ako siyang gihatod sa ilahang appartment, nakit-an bitaw dayon na sa iyang kuya ang sing-sing sa iyang kamot kay mao ray nilahi nga sing-sing. Ningisi ang iyang kuya, niingon dayon ko, “uli na ko kuya oi!”. Nikiss lang ko sa iyang manghod dayon lakaw. Wheeww, naglakaw ko nga lutaw kaayo..