Mga butang nga di~ pwedeng ibutang!!

Sus, unsaon man ni oi nga gi-apil man ko sa kabu-ang ni Jun. Ahh, mas maayo sab siguro para makahibalo sad ang akong mga fans kung unsay akong dili ganahan. Pero, mura man ko’g gitapulan. Ah unya nalang oi. Gilaay man ko gud. Pero kung dili nako ni tapuson kining tahas nga gipasa ni Jun, wala sad ko’y ma-post karong adlawa? Gilaay man unta ko’g pamutbot karon kay wala pa mahuman ang akong program. Sige nalang, ako nalang ning manitilan og tubag.

FOOD: Kare – kare kay dili ko ganahan sa iyang lami, humba, longganisa, o bisan unsang sud-an nga tam-is. Kuan man gud, kuanon man dayon ko basta maka-kaon ko anang kuan. Unya, unya’g human nako’g kuan, mokuan dayon ang akong kuan maong nisamot ang akong pagkakuan anang kuana. Sukad pa gyud atong kuan pa ko, dili na jud ko mokaon anang kuan kay naahhh, maglain jud akong kuan.

FRUITS: Tanang prutas nga wala sa akong panan-aw. Oo, dili ko ganahan anang mga prutas nga wala sa akong palibot. Pero isuway lang og tunol nako, bisan panit ako pa gihapon nang panitan.

VEGGIES: Magsakit man akong ulo og huna-huna ani kay tanang utanon mokaon ra ba jud ko basta ayaw lang isagol sa kare-kare. Oo, kaon ko bisan unsa oi. Mokaon man gani ko’g tae basta maayo lang pagkaluto. Ikaw, mokaon ka’g tae? Lupig ka nako!

PEOPLE: Tanang tawo nga hinawayon, matapobre, mata’g-tiki…. aw apil ba ang mata’g-tiki? Ahhh basta kanang mga tawong nagtuo nga sila na ang pinaka-gamhanang nilalang….

EVENT/SITUATION/INCIDENT: Kanang makakita ko’g mga babaye nga mosimba pero ang gisul-ob kay kanang makapagahi sa mga unod nanghumok, makapukaw sa mga unod nga nakatulog, makasamok sa mga unod nga malinawng nagpuyo. Bitaw bah, dili man sa ingon nga dili ko ganahan sa ilang gisul-ob. Kalami ana ah. Laki gud ta. Pero unta, ibutang lang intawn sa lugar. Simbahan biya ang imong gisudlan. Unya bitaw’g tutokan imong bus-ok nga dughan og ang nilakra nimong bu-ak, masuko ka. Isul-ob lang gud na sa laing lugar.

TV SHOWS/MOVIES: “Kung Mahati Man ang Otap”. Dili jud ko ganahan anang pelikulaha. Mamatay nalang ko dili jud siguro maabot ang panahon nga ganahan ko ana nga movie. Nakatan-aw na mo ana nga movie? Imposible kung nakatan-aw na mo. Ako ra gud ang nagbuhat sa titulo, so wala pa sad na nila ma-shoot.

MUSIC: Kanang mga kanta para sa patay. Kinsa man sad intawn ang ganahan anang kantaha oi. Ikaw ganahan ka?

HOUSEHOLD CHORES: Manglampaso. Naaaahh, palabha, paluto-a, paplantsaha nalang ko ninyo kaysa manglampaso. Pero diri sa Makati, ako gyud intawn ang tiglampaso sa among sawg. Wala may laing masugo si ate, unya isip usa ka buotan og masulundong manghod, manglampaso nalang sab intawn ko. Pero ang utok nag-rigor, ang simod nagbagotbot.

THINGS AROUND THE WORLD: Gubat, Eleksyon…ug uban pa! Ganahan ko motan-aw og movie nga gubat pero kanang tinuod nga gubat dili jud ko uyon ana. Unsaon, pung pa ni Little Johnny (Gamayng Juan), “I hate war..coz war makes history… and some poor-innocent kids like me have to memorize them all!”.. Unya’g maminyo ko, dayon magbuhat mi’g bata sa akong asawa, dayon mabuntis siya, dayon sa ika-siyam nga buwan sa iyang pagsabak manganak siya, og unya’g modako na among anak, iyaha nang memoryahon ang mahitungod sa gubat sa tibuok kalibotan?!!! Yamat ra ah. Yatis gud ninyo…

THINGS ABOUT MYSELF: Sus, moangkon jud ko. Dili ko ganahan sa akong pagka-botboton. Grabeh. Swear. Pwamis.

Og karon kay nahuman na nako ang tahas nga gipasa ni Jun, panahon na sab nga ipasa nako ang kining mutya sa pagka-ungo aron mokatag og modaghan og unya magbinanggaay ta sa atong paglupad…

Dawata kining usa ka sakong putyukan…. bitaw oi, akong isturbohon sila si:

Darlene, Weng, Lory (ang akong crushmate), Palakang Bisaya, Haze, Dr. Tess - The Eye Doctor (maoy nagtuli nako’g usab), Leylander, Ivy, Lollipop, Anne og si Lutchi