Botbot Unlimited

Naaahhh, naa koy atraso ni GFD, wla nako ma-mail ang book. Nangadto man gud mi ni ate sa among ig-agaw sa Las Piñas kay gimingaw kuno nako ang mga kids niya. Pero nagduha-duha jud ko kung mokuyog ba ko o dili kay fight ra ba ni Pacman sa Dominggo. Nangutana ko ni ate kung adto ba mi mangatulog, “oo” man kuno ingon siya. Wala ko mahimutang, niingon ko nga ikaw nalang magpabilin didto, mouli lang ko diri sa gabii. Og tuod man, pila ray sugilanon, niuli jud ko pagkagabii.

Pagka-ugma niana (gahapon sa buntag), sayo kaayong nagtext si kuya nga toa sa Davao.

“Dong, tan-aw ka Pay Per View? Pag-unlimited nalang diha para matext ko nimo sa mga updates kay delayed telecast ra ning amo-a!”.

“Oo, tan-aw ko PPV!”. 

“Asa man ka tan-aw?”. 

“Sa PPV lagi!”

Hehehehe, nagkatawa ko sa akong tubag ni kuya. Nitutut nasad akong cellphone,

“Tarong bah, asa ka tan-aw PPV sa Megamall, Shangrila, etc.”

Nakalimot ko, wala man diay nako ma-unlimited akong cellphone. Sus, ubay-ubay na jud to’g nakuha dah. Pero sagdi nalang, unya nalang ko magreload kay kabalo ko nga below 500 na to akong load kay wala nako ma-activate dayon ang text-unlimited sa Globe. Basta mag-below 500 na gani akong load kay magreload man dayon ko ana. What’s money after all. Sus, pagcheck balance nako, 22 pesos naman lang diay akong load. So akong gi-activate ang text unlimited dayon nireply ko ni kuya,

“Naa ra ko tan-aw sa PRC oi. Wide screen lang gud. Mahal kaayo sa Shangrilla, 600 ang ticket didto, 500 sa uban. Maayo pa diri sa karerahan sa mga kabayo 5.00 lang.”

“Ah sige, text nako dong ha. Salamat.”

Didto temporaryong naputol ang among panagtext ni kuya. Apan tungod kay wala man ko’y mabuhat, nakahuna-huna ko nga binuangan nako og text si kuya.

“Kuya, nagstart na ang fight ni Pacman. Dilikado si Pacman, na-knockout man gud naigo sa ulo!”

“Atik sad ay. Tarong bah.”

“Lagi, kay pagsaka niya sa ring nadakin-as man siya. Natakilpo pa jud unya ang iyang ulo nabunal sa sawg. Ga-danghag lang sad ang nawong gud! Nakuyapan gud og usa ka minuto og tunga sa oras.”

“Hahaha, ataya jud nimo dong oi. Hehehe”

“Bitaw kuya, nindot kaayo’g kondisyon si Barrera. Mura’g dili ni madali-dali ni Pacman. Ang akong prediction ani kay ma-knockout si Pacman sa round 13!”

“Ah, imposible’g ma-knockout si Pacquiao dong oi nga kagahi’g nawng ana!”
“Aw unsa, round 13? Hehehe matingala man sad ta..”

Wala na ko makareply ni kuya kay nagstart naman jud. Sus, maka-apil sad ko’g pangusog oi. Manggahi gud ang akong kaunoran samtang naglingkod ko nag-atubang sa big screen. Pagkahuman sa round 12, medyo dismayado ko kay gusto gyud unta ko makakita ni Barrera nga magluhod og mangamuyo ni Pacman nga dili na siya kulatahon. Pero saon ta man, pwerte man sang talawana ni Barrera. Tikasan pa jud kaayo. Ni-text nalang ko ni kuya.

“Kuya, mao pa jud paghuman sa fight. Pacman wins, pero niabot pud lagi’g round 12. Talawan man kaayo si Barrera gud dili moharong bah. Mura’g damang nga nikumong! Nanalaw!”

“Ayy giatay. Sige dong salamat. Tan-awon nalang sad nako ang delayed telecast kay basin mausab ang desisyon diri bah. Andrade pa man ni versus Mack.”

Wala nalang ko moreply, niuli nalang ko kay gutom na kaayo! Maayong buntag diay ninyo diha oi mga igsoon ko diha ni Kristo. Hinaot nga nakamata pa mo diha, nakaligo na og wala nay agit-it sa liog. Basin naa pa moy laway nga nanggahi sa kilid sa inyong baba ha. Sus, ang muta biya..