Lingaw-lingaw namo gahapon!!

Good morning ladies! Hello Philippines and hellow world! Naana na sad ta sa ika-dili-na-nako-maihap nga yugto niining akong pagpamotbot. Hinaot nga nakapanudlay na mo mga mujer, kabalo ko nga ang uban ninyo gadali-dali kay hapit na malate. Siguro ang uban ninyo gipaningot pa pag-ayo. O sus, nagdagayday gud sa bugan ang singot!

Ako unta’ng isugid ang mga malipayong gutlo sa among kinabuhi gahapon atol sa pagsaulog namo sa akong pangging sa ika-duhang tuig nga anibersaryo sa among pagminahalay, dili pagminahayay ha, minahalay, apan dili nalang kay dili nako gustong un’han si Tito Boy Abunda. Nahibu’ng mo noh nganong naghisgot ko ni Tito Boy? Niadtong niaging Biyernes, giimbita na mi daan ni Tito Boy nga mag-guest sa Boy & Kris nga talk show og nangutana siya kung kanus-a mi makahigayon kay naa sad raba mi’y panginabuhi. Ako siya’ng giingnan nga sa Oct. 9 nalang. Og misugod na ang pagka-chikadura ni Tita Girl, este Tito Boy, ingon dayon siya, “Unsa may significant anang adlawa?” Ako lang sad siyang giingnan, “Sa Oct. 9 na nimo mahibaw-an Tita kay kung tubagon nako karon, wala pa biya koy bayad ani!” Ingon sad si Tito Girl, “Maru-maru jud ka dong ay!” Nisagbat sad si Kris, “You know, ang gwapo mo talaga! Ba’t ayaw mong mag-artista?” Nitubag sad ko, “Binubola mo naman ako eh!”. Dali-dali sang sagbat ni Kris, “Bakit naniwala ka naman!?”

Kabalo man siguro mo noh nga bisaya sad na si Tito Boy? Nindot sad kaayo siya ika-storya oi. Nindot sad kaayo ang dagan sa interview nilang duha ni Kris gahapon sa taping nga Boy & Kris. Pero dili kaayo ko ganahan ni Kris kay kusog kaayo mambara og istorya, kanang mokalit lang og singit bah. Anyway pagkahuman sa taping, modiritso na unta mi sa akong pangging sa among laaganan kay syemper, mag-date2x sad mi oi. Apan nikalit man og nga-ab akong cellphone. Naay nagtext. Wala ra ba ma-register ang number sa phonebook maong wala ko kabalo kung kinsa ang nagtext. Yuna pa akong basahon pag-usab ha..

“-Asa man ka? Reply sad oi.
ganiha ra ko naghuwat nimo.
naa ko sa abs-cbn,
taping nato ron sa teleseryeng PANDAY
pagdala og martilyo, lansang og gabas
kay magkoral ta!

- Gamayng Juan”

Pastilan, pagkasipat jud. Si Gamayng Juan ra man diay. Naa diay siya’y bag-ong numero. Hayyy.. Kung gusto mong motan-aw sa TV guesting namo sa akong pangging sa Boy & Kris, i-air na kuno to nila ugma ang among episode! Oo, nah, bahala mo oi kung dili mo motu-o.

Naglaroy-laroy lang mi sa akong pangging gahapon pagkahuman sa among taping. Sa kinatibuk-an, super-enjoy jud ming duha gahapon yadz! Nahala, magsugod na ko’g trabaho ha. Nagsakit pa biya ni akong kalawasan ay mura’g gipamaulan. Magpamasahe unta ko ni bai Jerry apan mura’g maikog man gud ko kay nagbagutbot pa ra ba to sa mga inutel nga proyekto sa gobyerno! Nanghambog ra ba to nga pwede na kuno nakong ibadlis-badlis sa ilang karsada ang akong Toyota Innova. Mura’g nakauyon ko da, pero ang gusto nako’ng ibadlis-badlis sa ilang karsada katong akong “TANKE DE GIRA”. Mas maayo to kay bisan sa layo pa nagdahunog na ba! Maayong adlaw ninyong tanan oi. Og hinaot nga magkapuliki mo’g sagang sa mga grasya nga inyong madawat gikan sa Kahitas-an! Share lang mo ha!?? Ayaw pag-hinakog!! Masuko si Jah ana..

---

Possibly related posts: (automatically generated)

• Mga Komentaryo didto sa Istambay sa Mindanao kabahin sa “Mga Kinurisang B…
• Maniac Little Ninja Turtle
• ang akong bidyinggit