Upa Vs Jerjer

5:30 pa lang, naana ko sa balay gahapon. Wala nako sundo-a akong pangging kay naa man silay lakaw mga barkada niya. Dili man sad ko gusto mokuyog kauban iyang mga barkada kay ma-OP unya ko, kung ako sad ang naay lakaw kuyog mga barkada nako, dili man sad siya mokuyog. Ingon ana among relasyon, naa siya’y panahon sa iyang mga barkada, naa sad ko’y akong panahon. Social reponsibility man na namo nga makig-mingle sa mga higala namo, as long as nakahibalo ko kung asa siya og siya sab nakahibalo kung asa sab ko.

Pag-abot sa alas-sais, nagluto na ko og kan-on kay gigutom na ko. Palit dayon ko’g pancit canton parisan og 5 ka buwad. Mao ra to akong sud-an kay gimingaw na ko’g buwad. Lami biya kaayo ning buwad, di ba bai Jerry? Dili lang bingka sa Mandaue ang lami oi, buwad sad lami kaayo. Bisan pa nga pinobre kaayo akong sud-an gabi-i, nagdagayday biya sab ang akong singot.

Apan balik una ta sa pagpalit nako’g pancit canton og buwad sa dili pa ko magluto ha? Nagkatawa ko sa subay sa akong amigo nga mas nauna nako’g palit. Boy Jones may alyas atong tawhana nga bisaya sad, nipalit siya’g Red Horse sa tindahan ni Kuya Nelson. Samtang gihuwat pa niya iyang sukli, nisugilon dayon siya nako…

Boy Jones: “Saba kaayo sa apartment namo maong nigawas ko, palit ko’g Red Horse oi”

Ako: “Ngano diay, unsay okasyon didto sa inyo?”

Boy Jones: “Walay okasyon gud. Naglalis akong asawa og ang asa ni Mang Noli nga nag-abang sa pikas bah!”

Ako: “Nah, bungangera sad raba to!”

Boy Jones: “Nagpares lagi ang duha ka dagko’g baba. Mga dagko sad og kuan. Nagpa-sounds man gud ko sa amo nya napakusgan sa akong asawa, nikalit man lang og singgit tong asawa ni Mang Noli! Pwerte ra bang taasa sa tingog, high pitch kaayo bah. Ingon dayon siya ay, ‘Hoy, tangina nyo wag kayong maingay jan. Alam nyo namang may naka-upa dito sa kabila eh!‘”

Ako: “O, unya unsa say tubag sa imong baba-on sad nga asawa?”

Boy Jones: “Ay wala sad palupig, giingnan sad niya nga, ‘Uy-uy-uy-uy pag-inupahay mo diha’g inyo kay mag-jerjer sad mi diri’g amo, tangina ka!“

Nisaka nalang ko sa balay kay giagda nako’g inom. Dili man sad gud ko ganahan moinom kung naa koy trabaho unya’g ka-ugma. Gibiya-an nako siya didto nga nagtungab-tungab sa iyang Red Horse!

Namotbot lang ko’g kadali samtang wala pa akong boss-amo-agawon-manager!! Maayong adlaw ninyong tanan diha!!