Ang Saad Sa Yutang Panaad!!

Sa akong hamubo apan mabungahong pag-istar sa Yutang Panaad, adunay mga butang nga nikulit og nagduyan-duyan sa malumo kong dughan og usa na niini ang akong pagkahimamat sa mga taw’ng naghatag nako’g kadasig aron sa pakigtigi sa mga inadla-adlawng gimbuhaton – ang mga malipayon og maabi-abihong mga tawo sa Nestlé Cagayan De Oro factory. Sir Bart (nga dili magpatawag og Bartolome), Sir Noel, Sir Joel, Sir Darwin, Sir Loloy og Sir Nonie (nga nangagda nako’g suroy sa usa ka lawak sa mga ….aheem…), sila ang mga taw’ng nagdugang nako’g kadasig sa akong pakiglambisog sa akong inadlawng pagpanginabuhi. Sila ang mga tawong nahimo nakong mga higala su’d sa hamubong higayon, ang uban ani nila higal sab hehehe.

Sa usa ka buwan og tunga nakong pag-istar sa Cagayan, naay mga panahon nga niabot ang akong kahidlaw sa karneng kinilaw apan niabot nalang ang gutlo sa akong pagbiya sa Yutang Panaad wala gyud intawn ka-taroy (pu’ng pa ni Sir Nonie og ni Sir Bart). Naay usa ka higayon pagkahuman namo og pagpangaon sa Countryside Steak House, gi-agda ko nila ni Sir Nonie og ni Sir Loloy nga manglaag. Gusto unta ko mokuyog apan naikog sad ko sa duha nako ka-ikog este kauban, maong gipaagi nalang nako og ngisi-ngisi ang akong pagbalibad. Nagpasalamat sad biya ko kay wala ko makasala sa akong pinangga nga nahabilin diri sa Makati apan niadtong gutlo-a, ikumpisal nako ninyo nga dako sab intawn ang akong pagmahay. Haaayyyyyy, bisong na unta to…

Pero akong isaad nga mobalik ko sa Cagayan sa dili madugay. Mobalik ko ngadto kay wala man ko’y mahimo kung pabalikon ko didto kay naa pa man ko’y usa ka project didto. Pero sa tinuod lang, nindot sad kaayo itrabaho labi na kung ang mga tawo sa imong palibot pareho sa mga tawo nga akong gipanghinganlan sa itaas. Bisan pa man tuod nga moabot ang panahon nga magkapuliki og magkagidlay ko’g sagang sa mga problema nga ipasa kanako gikan sa taga-production, mahimuot sad kong maghuna-huna kay kabalo ko nga sila sab, nagkabuang kung unsaon nalang pagtabang sa mga data nga na-declare na sa SAP.

Sa dili pa ni nako tapuson, tugoti ako sa pagyagyag niining nagbaga sa kainit nako’ng pasalamat sa mga tawong akong nahimamat og nahimong mga higala sa Cagayan. Salamat Sir Bart sa imong pag-agak kanako sa panahon nga ako nalugmok tungod sa mga problema nga atong naagi-an atol sa atong pagpakigbugno sa atong project. Salamat Sir Noel nga bisan sa panahon nga pressured kaayo ko, naa gihapon ka nga nagsige og pakatawa. Sir Darwin nga maoy nihupay sa nagsalimuot kong tanlag (keber!). Sir Joel, bisan pa man sa mapanghasi nimong tingog, nagpitik-pitik gihapon ang imong kasing-kasing nga gialirongan og gidan-agan sa makabuta’ng suga sa mga aninipot (pasensya na jud Sir kung wala kay nasabtan aning akong kabuang). Kang Sir Loloy nga maoy pinaka-kalma nga nilalang nga akong nahimamat diha sa Cagayan. Ug kang Sir Nonie nga maoy nagsuway kanako kung unsa gyud kaligdong ang akong baruganan batok sa mga lawasnong kalipay (pero unya’g balik nako sir, modayon na jud ta ha?). Og sa tanan nakong mga fans og sponsors, Rik-rik Corn Snack og Rik-rik green peas, salamat kaayo. Og kang doktora Vicky Belo diay…

Merry Christmas nalang kanatong tanan og hinaot nga makaplagan na nato ang dugay na natong gipangita, ang lunsay nga kalinaw og kalipay, og unta makabaton kitang tanan og tinuod nga gugma sa usa’g-usa nga maoy gitudlo kanato ni Kristo Hesus nga atong manunubos. Ang gugma og kalinaw sa Ginoo magauban kanatong tanan. Merry Christmas and have a Christ-filled holiday season.