Bag-ong Karaan~!

Happy New Year!!!

New year naman diay. Unsaon, wala man nako maabti ang paglakang sa tuig. Alas diyes pa lang, pwerte naman nakong tuloga. Gipukaw kuno ko nila, wala gihapon kuno ko momata. Sayo man kaayo nahubog gud. Nakaingon na jud ko sa dili na maihap nga higayon nga dili na ko moinom.

Pagkabuntag na nako nabasa ang tanang mga mensahe sa akong cellphone. Mga greetings gikan sa akong mga minahal sa kinabuhi – nanay nako, mga kaigsoonan, mga iyaan, mga uyoan, mga ig-agaw, mga higalang higal og uban pang mala`ng mananap. Nagkatawa lang ko sa mga greetings sa akong mga ig-agaw.
“Kid, hapi new year. Hinaot nga kining tuiga magdala kini kanimo og dugang swerte sa imong career sa showbiz – nga unta magtumpi-tumpi pa gihapon ang imong mga endorsements, tv shows og unta dili nalang nimo taakon ang kalibutan sa politka.” – mao ni ang mensahe sa akong ig-agaw nga ka-edad ra sad nako.

“sK!Drow, hapi new year. Wishing u all the best – best actor og uban pang mga best” – pung pa sa usa nako ka ig-agaw sa Davao.

“Kid, malipayong pagsugat sa bag-ong tuig. Hinaot nga makakaplag ka’g daghang bahandi karong tuiga sama sa nagtapun-og nga mga salapi og nagkadaiyang mga giti” – susmaryosep, mao intawn ni ang gipadala sa akong ig-agaw sa Lilo-an.

Nagkatawa jud ko og maayo sa ilang mga mensahe. Pastilan, ang akong mga ig-agaw mga sipat jud kaayo. Naka-ingon nalang ko sa akong kaugalingon nga kung magkuyog ming tanan uban sa akong mga ig-agaw’ng pating, ma-aan man siguro mi’g mga abnormal.

Naa pay usa gikan sa akong manghud, “Kuya, hapi new year. Hinaot nga baskog ka kanunay. Maayong panglawas og pirming utog nga armas maoy akong gipangamuyo para kanimo!”

Mura uroy kog mamatay.

Magbag-o na tang tanan oi. Ikaw bai Jerry pagbag-o na intawn, utang buot hehehe. Apan unsa man akong bag-ohon? Mao jud ni ang akong pangutana nga nagtangag og dakong tae, este ganti.

Gabii, akong gihinuktukan ang mga butang nga kinahanglan nakong usbon. Apan hangtod karon, naghinuktok pa man ko so, dili pa nako mailatid dinhi sa akong payag. Sa sunod higayon nalang oi. Sige, trabaho na ta. Palihi bah..