Nakuratan Ako!!

“Kung bati-on mo ang kaluya, fighter wine maoy pangita-a…..”

2008, aaarrrggg, kapoy ning tuiga. Wala na ko lung-i sa akong trabaho-on. Nagtumpi-tumpi na. Niadtong niaging Hwebes, nilupad ko padulong sa Cagayan de Oro para mo-attend sa Post Implementation Meeting sa Nestle, CDO Factory. Hinu-on, balik ra sad ko dayon diri sa Makati pagka-Sabado niana.

Abi biya gyud unta nako’g magdugay nasad ko ngadto.

Kumusta na kaha to si bai Jerry noh? Si Weng? si Mam Darlene? si Mami Karlota? si Mam Tikya? Si…… taym pa, daghana pud ani nila oi kung akong panghinganlan tanan. Basta, kamong tanang nilili diri, manghinaot lang ko nga nagka-igit-igit gihapon mo’g pas-an sa mga grasya.

Samtang naa pa ko sa Cagayan de Oro, Biyernes to sa gabii, nilaag ko sa Limketkai Mall. Suroy-suroy lang, basin diay makakita’g babaye’ng magpataroy…..aw unsa ba.. Ganahan biya jud ko sa Limketkai kay mga gwapa kaayo ang naa sa ilang Concierge booth. Smiling pa kaayo. Smiling ba, kanang mapahiyomon, dili kanang kataw-anan og nawong. Usahay mopasangil lang gud ko’g pangutana asa ang CR para lang maka-chika niining mga maanyag nga dalaga. Aw, ambot kung dalaga pa ba to silang tanan. Basta gud, hugot pag pamanit, sa lawas makapainit.

Nakuyawan jud ko atong pagdayon na nakong uli. Pag-gawas nako sa mall, naay usa ka matahom nga babaye ang nanitsit nako og iya kong gitawag, “Pssst gwapo!”. Wala nako kini panumbalinga kay gikulbaan ko. “Psst, gwapo KAAYO!!”, sus nangurog na akong tuhod sa kakulba samtang nag-atang ko og taxi. Nikalit bitaw na siya’g babag sa akong agi-anan. Pwerte ra bang sexyha, manggahi jud ang imong unod bah, mura gud og namarog ang akong balahibo. Kung maghuna-huna pa jud ko’g lain, nahhh, motuskig sad siguro ning akong gidala-dalang alho. Niingon dayon siya, “Pwede makadagkot?”. Mao diay, wala diay kuno siya’y lighter. Maayo nalang gani kay nawagtang ang akong kakulba. Ako nalang sab unta siyang pangutan-on kung pwede sab ba siyang dagkotan pero dili nalang jud ko oi. Dili jud ko gustong makasala sa akong pangging.

Na hala, trabaho na sad ta.. Maayong adlaw ninyong tanan diha mga suking tigpaminaw, este, mga swake nakong mga higala diri sa kahanginan.